ආරොන් මාමා - ෆ්‍රෙඩී සිල්වා | Aaron Maamaa - Freddie Silva


ආරොන් මාමා...

ආරොන් මාමා වයසක මිනිහෙක් ඉපදුණ අපෙ ගම්මානේ
මිනිහගෙ ජොබ් එක කේලම් කීමයි තැන තැන කඩපිල් ගානේ
නිතරම හීනෙන් බයවෙල වාගෙයි ලේ කඳුලක් නෑ මූණේ
දවසක් දා කළ වැඩක් කියන්නම් අහගෙන ඉන්නම ඕනේ

ආරොන් මාමා

රටේ තොටේ වග තොරතුරු හොය හොය දවසක් ගම වට ඇදුණා
සාතන් අප්පුගෙ ගේ ළඟදී පොඩි කලබලයක හඬ ඇසුණා
මිනිහ දඬු පඬු ගහලා බිත්තිය අයිනට දුව පැන්නා
ජර මර සද්දෙට කණ දීගෙන උන්නා

ආරොන් මාමා

ගහපිය මරපිය ඔළුවට කොටපිය පාළි සංස්කෘත කිව්වා
සාතන් අප්පුගෙ කොළුවා දුව පැන යකඩ පොල්ලකුත් හෙව්වා
කිසි සැකයක් දැන් නැහැනේ මිනිහෙක් මැරුවා වාගෙයිනේ
මුළු ගමටම අණබෙර ගහමින් දිව්වා

ආරොන් මාමා

සාතන් අප්පූ මිනිහෙක් මැරුවා ආරොන් ඩොලාට කිව්වා
ඩොලා ජෙමාලට ජෙමාල ජොසීට ජොසීල ඇගීට කිව්වා
ගමම කුලප්පුව දිව්වා සාතන් අප්පුව හැම හෙව්වා
කඩු පොලු අරගෙන ගෙය වැටලූවා

ආරොන් මාමා

කාවද මැරුවේ කියපිය කියලා සාතව අල්ලල ඇහුවා
මිනිහා හිනැහී මරාපු පොළඟෙක් ගෙයි මැද සාලෙන් තිව්වා
ඔළුවට ගැහුවේ මූගේ මූ හිටියේ ඇඳ යට මාගේ
ගැහි ගැහි කුකුළෙක් වාගේ ආරොන් පැනලා දිව්වා

ආරොන් මාමා වයසක මිනිහෙක් ඉපදුණ අපෙ ගම්මානේ
මිනිහගෙ ජොබ් එක කේලම් කීමයි තැන තැන කඩපිල් ගානේ
නිතරම හීනෙන් බයවෙල වාගෙයි ලේ කඳුලක් නෑ මූණේ
දවසක් දා කළ වැඩක් කියන්නම් අහගෙන ඉන්නම ඕනේ

ආරොන් මාමා



ගායනය - ෆ්‍රෙඩී සිල්වා
ගී පද - ප්‍රේමකීර්ති ද අල්විස්

ඉස්සර මං ගිය පාසැල ඇරිලා - සුනිල් එදිරිසිංහ | Issara man giya pasala arila - Sunil Edirisingha











ඉස්සර මං ගිය පාසැල ඇරිලා
පුංචි පැටව් පෙරහැරෙ එනවා
හේවිසි ගහගෙන හූ හඬ දීගෙන
ලන්ද පුරා දුව පැන එනවා
මේ දරු දැරියන් නොදුටුව දෑසින්
එක දරුවෙක් තනිවී එනවා

ගහකොළ සෙළවී ඔහු දෙස බැලුවා
බිම් මල් හිනැහී හිස වැනුවා
ඒ දඬුමංකඩ තිත්ත පැටවු රැළ
ඔහුගේ සුවඳට ඉව කෙරුවා
මේ විසිතුරු හැර කොතැනක යන්නද
පුංචි දෙපා එක තැන රැඳුනා

ඉර මල පිපිලා දොඹ ගහ මුදුනේ
නෙළුම් රටාවකි තණ ගොල්ලේ
නීල කොබෙයි රැළ පේලි සැදී හිඳ
මුතු ඇහිඳියි මදටිය ගාලේ
ගිනි මද්දහනේ කුසගිනි නොදැනී
තාමත් ඔහු මේ වන නිල්ලේ

පොත් පිටු අතරේ නොරැඳෙන දෑසින්
වන වදුලේ අසිරිය දකිනා
ගම් දරුවන් මැද මේ දරු පැටියා
මගේ නෙතට කඳුලක් නැගුවා
ඔහුට මුවාවී පාසැල් යන්නේ
මා දැයි නිකමට මට සිතුනා

ගායනය : විශාරද සුනිල් එදිරිසිංහ
සංගීතය : එච්.එම්.ජයවර්ධන
පද රචනය : කුමාරදාස සපුතන්ත්‍රී


චන්ද්‍ර බිම්බයුරු - නාරද දිසාසේකර | Chandra Bimbayuru - Narada Dissasekara


චන්ද්‍ර බිම්බයුරු ඔබෙ වත පවසයි
මෘදු හදවතක තතු..
ඉන්ද්‍රනීල මිණි සේම දෙනෙත් යුග
නොකරමි දිනක රතු..//

අන්ද මන්ද දැඩි චන්ඩ සිතුම් ඇති
පුඟුලන් මැද දෙරණේ..
ඉන්ද්‍රඛීලයක් සේ මම ඉන්නෙමි
නිරතුරු ඔබ සෙවනේ...

චන්ද්‍ර බිම්බයුරු...//

අදත් සිනාසී හමුවූ අයුරින්
භින්න රුචික මෙලොවේ...
හෙටත් උදෑසන පිබිදෙන දෑසින්
අප හමුවිය යුතු වේ...

චන්ද්‍ර බිම්බයුරු...//

ගායනය : නාරද දිසාසේකර
සංගීතය : නාරද දිසාසේකර
පද රචනය : කරුණාරත්න අබේසේකර

එදා ඔබ මෙහි - නිර්මලා රණතුංග | Eda Oba Mehi - Nirmala Ranathunga


එදා ඔබ මෙහි නොආවා නම්
නෑ මෙවන් දුක් වේදනා..
අළුත් පාසල් වාරයේ...
අළුත් සිසුවෙකු සේ...

කෝල බැල්මෙන් සසල දෙනෙතින්
සැලී ඔබ ආ මුල් දිනේ...//
නුහුරු ඇසුරක මැදිව අසරණ 
නෙතින් මා වෙත බැලූ වේලේ..
ඔබේ දෙස මා නොබැලුවානම්
නෑ මෙවන් දුක් වේදනා..
නෑ මෙවන් දුක් වේදනා..

මගේ හදවත පිදූ මුත් මම
ඔබේ ලොව තනියට එදා...//
මගේ තනියට නොමැත අද ඔබ
සිටින ඒ ලොව ජය ලබා...

එදා ඔබ මෙහි...//

ගායනය : නිර්මලා රණතුංග
පද රචනය : කුලරත්න ආරියවංශ
සංගීතය : රෝහණ වීරසිංහ

තාත්තා වගේ - හර්ෂන දිසානායක | Thaththa Wage - Harshana Dissanayake


තාත්තා වගේ නුඹ ගැන සොයමින් නිතිනේ..
අපටත් වඩා නුඹටයි සෙනෙහස පිදුනේ..
නුඹෙ පයකින්ම අප්පච්චිට වින කෙරුනේ..
හිතලද වැරදිලද කියපන් ඇත් රජුනේ...

මා ඔය දිගේ නුඹෙ මඩ සෝදා ඇරලා
පොල් බොඩ කිතුල් බොඩ නුඹ වෙනුවෙන් හොයලා
ලද සොච්චමට වැඩියෙන් දහදුක් විදලා
අප සැප බැලුවෙ නුඹෙ කුස ගිනි නිවලා...

තාත්තා වගේ නුඹ ගැන...//

බත්පත ඉදෙන විට පින් දුන්නේ නුඹට..
බඩගිනි දැනෙනවා දැන් වැඩියෙන් අපට..
ආවොත් අප්පච්චි ආයෙත් අපෙ ලොවට..
අප ගාවට කලින් එන්නේ නුඹ ලඟට...

ගායනය : හර්ෂන දිසානායක


පුන්සඳ රෑට ඇවිදින් - නිරෝෂා විරාජිනි | Punsanda Rata Evidin - Nirosha Virajini


පුන්සඳ රෑට ඇවිදින් හේනේ කළුව බිඳ..
රන්කෙදි සේම රන්වන් ඉරිගු සිඹිනවාද..
තුන්යම හීන දැක දැක මොටදැයි ගෙදර හිද..
රන්කද තාම පැල් රකිනවාදෝ නිදි නැතිව..

නිල් තරු රෑන ඉඟි බිඟි පාන අහස යට..
පිල්කඩ උඩම ඇලවී ඉන්න හිතයි මට..
මී අඹ කන්න ගිරවුනි එන්න එපා හෙට..
මල් පිපුනාට ගෙඩි නෑ තාම අඹ ගහට...

පුන්සඳ රෑට...//

රන් කඳ සේම පින්සර මාගේ ඇතු නිදන..
රන් මල් යාන හීනෙන් දකින පින පමණ..
තුන්පත් රෑන වේදෝ කොහොම අප දෙදෙන..
රන් කැටි පුතුට ඉඩ මදි වාද මගෙ යහන...

පුන්සද රෑට...//

ගායනය : නිරෝෂා විරාජිනි
සංගීතය : ඔස්ටින් මුණසිංහ
පද රචනය : රත්න ශ්‍රී විජේසිංහ

සරසවි උයනේ - ක්ලැරන්ස් විජේවර්ධන | Sarasavi Uyane - Clarence Wijewardana


සරසවි උයනේ - මේ තුරු සෙවනේ..
අපේ සොදුරු ලොව අතීතයේ...
මහවැලි ඉවුරේ - නිසසල අරණේ
මැවූ සිහින ලොව බිඳී ගියේ...

සීතල සිරිපොද වැස්සේ..පෙර
දිනයක මේ අඩි පාරේ..//
අප තනි වූ මැයි තුරුසෙවනේ..මත
ඔබගෙනි උණුසුම රැදුනේ...

සරසවි උයනේ...//

පාළුව ඉහිරෙන අඳුරේ..මා
තනිකර දා මෙහි සෙවනේ...//
මතකය පමණකි ලඟ රැදුනේ..ඔබ
අද කොතැනද පිය නැඟුවේ..

සරසවි උයනේ...//

ගායනය : ක්ලැරන්ස් විජේවර්ධන

මං හින්දා ඔබෙ - ගුණදාස කපුගේ සමඟින් මාලනී බුලත්සිංහල | Man Hinda Obe - Gunadasa Kapuge & Malani Bulathsinhala



මං හින්දා ඔබෙ නෙතඟින් කඳුලක් හෙලන්නෙපා..
මං හින්දා ඔබෙ හද තුල සුසුමක් නැගෙන්නෙපා..
ගිවිසා ගනිමු අපි පෙම් යුවලක් සේ
කිසිදා එක් නොවෙනා...

අහස් මාලිඟා නැහැ ඔබ නිසා මැවී...
සැක සංකා නැහැ ඔබ ගැන හිතේ රැදී...
හිමිකම් නොකියමි ඔබට මගේ කිසිදා...
උරණ නොවන්නෙමි ඔබ අන්සතු වූ දා...

මං හින්දා ඔබෙ...//

අතැඟිලි බන්ධන නොපතමි පෙමින් බැදී..
ඔබ සිරකරලන දොරඟුලු දමනු බැරී..
නෑ කුල සිරිතෙන් සැලෙනා පෙමක් නොවේ..
පෙමට පෙමින් යන පෙම්ලොව මෙයයි අපේ..

මං හින්දා ඔබෙ...//

ගායනය : ගුණදාස කපුගේ සමඟින් මාලිනී බුලත්සිංහල
පද රචනය : සුනිල් ආරියරත්න
සංගීතය : ගුණදාස කපුගේ


සුඳු මුතු රළ පෙල - ටී.එම්.ජයරත්න සමඟින් නීලා වික්‍රමසිංහ | Sudu Muthu Rala Pela - T.M.Jayarathne & Neela Wickramasinghe



සුඳු මුතු රළ පෙල කිඳුරු කොදෙව්වෙන්
පාවඩ පලස එලා...
සිඳුළඳ ගෙනදුන් මුතු කැකුළක් සේ
ඔබ මට තිලිණ වෙලා...//

යුග දිවි වැල්ලේ අඳුරු ඉසවුවේ
මුකුලිත සිතැගි සලා...
අරුණැල්ලක් සේ...//නුඹමිණ පායා
සනහස ජනිත කලා...

සුදු මුතු රළ පෙල...//

සැඩරළ රැල්ලේ සැලෙන කැදැල්ලේ
රැඳුනෙමි සරණ සොයා...
පවනැල්ලක් සේ...//නොමහැර ආවෙමි
ඔබ හද සැදෙන තුරා...

සුදු මුතු රළ පෙල...//

ගායනය : ටි.එම්.ජයරත්න සමඟින් නීලා වික්‍රමසිංහ
සංගීතය : රෝහණ වීරසිංහ
“ආදර හසුන“ චිත්‍රපටයේ ගීතයකි.

හෙමින් සැරේ පියා විදා - ටී.එම්.ජයරත්න සමඟින් සුනිලා අබේසේකර | Hemin Sare Piya Wida - T.M.Jayarathne & Sunila Abesekara



හෙමින් සැරේ පියා විදා
සුමුදු සයනේ සිනිදු ඇතිරිල්ලෙන්
පලා ඇවිත් සිතුම් සියොතුන්
සුමුදු සයනේ සිනිදු ඇතිරිල්ලෙන්

මලක් නම් එය මලක් වුව මැන
සිනිදු සුකුමල රුවෙන් සරසන
විලක් නම් එය විලක් වුව මැන
නීල ඉදුවර දියෙන් උපදින

හෙමින් සැරේ පියා විදා
සුමුදු සයනේ සිනිදු ඇතිරිල්ලෙන්
පලා ඇවිත් සිතුම් සියොතුන්
සුමුදු සයනේ සිනිදු ඇතිරිල්ලෙන්

නැවුම් වත්සුනු රොනින් මත්වී
නීල නිම්නය සුපුෂ්පිත වී
සිහින් හඬකින් මහද අමතයි
මුදා හැරදා පවුරු සිඳි යහනේ

හෙමින් සැරේ පියා විදා
සුමුදු සයනේ සිනිදු ඇතිරිල්ලෙන්
පලා ඇවිත් සිතුම් සියොතුන්
සුමුදු සයනේ සිනිදු ඇතිරිල්ලෙන්

ගායනය : ටී.එම්.ජයරත්න සමඟින් සුනිලා අබේසේකර
සංගීතය : ප්‍රේමසිරි කේමදාස
පද රචනය : ධර්මසේන පතිරාජ

නීල බිඟු කැල - වික්ටර් රත්නායක | Neela Bigu Kela - Victor Rathnayake


නීල බිගු කැල තාමරස පෙල
ආදරෙන් සනසාලා
තිසර තුඩු මුදු තඹර පහසින්
මෝහනය වීලා //

මාරුතේ මතුරා යතේ
සුරඟුන් නැගූ මුකුළු
මාවතේ අතුරා ඇතේ
සුරඟුන් නෙලූ කැකුළු //
සුරඟුන් නෙලූ කැකුළු

නීල බිගු කැල...//

ජීවිතේ කිරි සාගරේ
කළඹා දිනූ කිදුරී
මීවිතේ මදුරා පුරා
සඟවා නොයන් සොදුරී //
සඟවා නොයන් ‍සොඳුරී

නීල බිගු කැල...//


ගායනය - වික්ටර් රත්නායක
පද රචනය - කේ.ඩී.කේ. ධර්මවර්ධන
සංගිතය - වික්ටර් රත්නායක


මදහස් පාලම - තිලිණ රුහුණගේ සමඟින් කුෂානි සඳරේඛා | Madahas Palama - Thilina Ruhunage ft Kushani Sandareka



මදහස් පාලම නැගලා එන්නට නොකියා මට කීවා...
හිතුවක්කාරෙට සිතනම් ඈතට කොහෙදෝ පියමැන්නා..
දෙනුවන් චාමර සැලෙනා තාලෙට රහසක් එහි රන්දා..
මෙතුවක් ඈතට මාගෙන ආවට දැනුනේ නැ සීමා...

සඳකත් රැයකදි තාරුකා - සරදම් ඉවසා ආ..
හිරිකඩ සීතල ගෑවිලා - ආදරේ දැනුනා
දැනුනා....ජීවිතේ පිරුණා....

නවතින්න නොඅසා ලමැදේ
ඉඩ දුන්නෙ කවුරුන්දෝ..
සිත දුන්නෙ නැ ඉන්නත්, පිටුපා...
මට මේ තරම් බර සසුමක්
බොරුවක් කියන්නට ඇතිදෝ
නිස්කාරනේ...සීමා බදීවී අළුතෙන්..

සංසාරේ දුටු පාරේ දැනුනාම හුරුපුරුදු...
ඔය ඇස් කතාකෙරුවා නැවතී..
අදහන්න හැකිදෝ කියලා මම මාගෙන් අහපූ
බව දන්නෙ නැ ඔබ දන්නවාද කියලා..

ගායනය : තිලිණ රුහුණගේ සමඟින් කුෂානි සඳරේකා
පද රචනය : විමලක මුහන්දිරම්
සංගීතය : තිලිණ රුහුණගේ
“චැලෙන්ජස්“ චිත්‍රපටයේ ගීතයකි.

ඔබ පාවී ගීයා - කවීශ කවිරාජ් | Oba Pavi Giya - Kaveesha Kaviraj


ඔබ පාවී ගියා දුර ඈතකට..
මා සසැලී තියා වරු ගානකට..
සැඟවෙන්නෙ නෑ..තරු දෑස..
ඔබ ඒදෝ සොයා මගෙ හීනෙකට..

මතක මවන්නේ - රැයේ හීන යායේ
දුක දන්නෙ නෑ.. ඈ මා සිතේ..//
නෙතු ගාවින් තියා රුව මොහොතකට..
ඔබ සැඟවී ගියා වෙන හීනෙකට..

සිතද නොදන්නේ - මැවී ඈව ආයේ..
ඔබ දන්නෙ නෑ.. මගේ ආදරේ...//
ඔබ ඒවී සිතා ලඟ පාතකට..
මා නැවතී බලා ඉමි ආ මඟම..
සැගවෙන්නෙ නෑ තරු දෑස
ඔබ ඒදෝ සොයා මාගේ සිහිනෙකට...

ඔබ පාවී ගියා....//

ගායනය : කවීශ කවිරාජ්

රෑ අහසින් - කසුන් කල්හාර | Re ahasin - Kasun Kalhara


රෑ අහසින් වැටෙනා
බින්දු බින්දු පිණි බින්දු
නොපිපි මල සොයනවා
මුවා වී ඉන්න එපා
හරි සීතයි
සීතලයි පින්න

සිප ගන්න බයෙන්
මහ පොළොව
පිණි බින්දු හඬනවා
නිම්නාද දී
දෙතොලතර ඉඩ දෙන්න
නවාතැන්පල වෙන්න
හරි සීතලයි පින්න

අනෝරා පිණි යටින්
තෙමි තෙමී ඇවිදින්න
ගිනි නැගෙනා ආත්මය
පිණි දියෙන් දෝවන්න
සිරුරතර ඉඩ දෙන්න
නවාතැන්පල වෙන්න
හරි සීතලයි පින්න


ගායනය, සංගීතය - කසුන් කල්හාර
ගී පද - සංජය ඈපා සෙනෙවිරත්න


බොල්පිණී වෑහෙන වේලාවේ - රූකාන්ත ගුණතිලක | Bol pini wehena welawe - Rookantha Gunathilake


බොල්පිණී වෑහෙන වේලාවේ
ඔබගෙන් සමුගෙන යා යුතුවේ
තාමත් ඔබ ඇත සුව නින්දේ
ඒකයි මා නොකියා යන්නේ //
බොල්පිණී වෑහෙන වේලාවේ

ගැලපිට නැගලා ඈත ගම් බලා
පියමන් කරවන්නේ
තවත් නිවහනෙක ගිමන් නිවනතුරු
ඔබ සිහියට එන්නේ
ඔබගෙන් සමුගෙන මා යන්නේ

ඔබ අවදිව මා සොයනු එපා
ඈතයි මා ඉන්නේ
තවලම්කරුවෝ කවරදාක හෝ
එකම තැනක උන්නේ

බොල්පිණී වෑහෙන වේලාවේ
ඔබගෙන් සමුගෙන යා යුතුවේ
තාමත් ඔබ ඇත සුව නින්දේ
ඒකයි මා නොකියා යන්නේ //
බොල්පිණී වෑහෙන වේලාවේ


ගායනය - රූකාන්ත ගුණතිලක


සෙවණැලි වාගේ - ක්ලැරන්ස් විජේවර්ධන | Sewaneli waage - Clarance Wijewardena



සෙවණැලි වාගේ ඔබේ මගේ
අපි දෙන්නා අපි දෙන්නා
එක කාලෙක ළංවී උන්නා
විකසිත වූ මා ඒ කාලේ

සිතන්න ඔබ ගැන මොහොතක් මදි විය
ඉවසන්නට මගෙ සිත ඉඩ නැති විය //
තනි වීලා ඔබ හා ඉඳගෙන කතා කරන්නට
දවසක් නැති විය

සෙවණැලි වාගේ...

අද සිතෙනා දේ නොබියව ලියවෙයි
ගෙවුණු අතීතය මිහිරෙන් නැහැවෙයි //
තනි වීලා ඔබ හා ඉඳගෙන කතා කරන්නට
දවසක් නැති විය

සෙවණැලි වාගේ...

විකසිත වූ සිත ඒ කාලේ



ගායනය - ක්ලැරන්ස් විජේවර්ධන


මීන නුවන් යුග - සේනානායක වේරලියද්ද | Meena nuwan yuga - Senanayaka Weraliyadda


මීන නුවන් යුග කඳුළු සදාගෙන
දුරු කතරේ තනි වූ යුවතී
නිදි නැති රෑ සුසුමන් පවනේ
ගැයු ගී මී බඳුනේ රැඳුණේ
ගැයු ගී මී බඳුනේ රැඳුණේ

බාලේ ඉඳන් පෙම් සිතුවම් ඇඳි
අද වෙන් වී නුඹ හිම පියසේ
කාල වලා නැග එන්නා නබෝ ගැබ
කාල වලා නැග එන්නා නබෝ ගැබ
බොඳ වී යයි මුදු වදන් මෙදා
බොඳ වී යයි මුදු වදන් මෙදා

සීත රටේ තනි මලට ලොබින්
ඈත ඉඳන් ආ බමරින්දූ
දෑසේ වෙළී සැඟවෙන්න වගෙයි අද
දෑසේ වෙළී සැඟවෙන්න වගෙයි අද
මාලවිකා මා බාල ලියේ

මීන නුවන් යුග කඳුළු සදාගෙන
දුරු කතරේ තනි වූ යුවතී
නිදි නැති රෑ සුසුමන් පවනේ
ගැයු ගී මී බඳුනේ රැඳුණේ
ගැයු ගී මී බඳුනේ රැඳුණේ



ගායනය, සංගීතය - සේනානායක වේරලියද්ද
ගී පද - කපිල කුමාර කාලිංග


පූජාසනයේ ඔබ හිඳුවා - නන්දා මාලිනී | Poojasanaye oba hinduwa - Nanda Malini


පූජාසනයේ ඔබ හිඳුවා
ඔබට පුදන මේ ලෝකයමයි හෙට
ඔබට එරෙහි වී නැගිටින්නේ
පූජාසනයේ ඔබ හිඳුවා

ඉසුරින් කිත් යසසින් බබළන දා
ඔබගේ බැණුමත් ගීයක් වේ
ඉසුරින් කිත් යසසින් පිරිහුණු දා
සිනාසුණත් එය වරදක් වේ

පූජාසනයේ...

කිරියෙන් පැණියෙන් උතුරා යන කළ
ලොව ඔබ පාමුල හඬා වැටේ
අත මිට හිඟ වී බෙල සුන් වන කළ
ලොව ඔබ හිස මත කඩා වැටේ

පූජාසනයේ...


ගායනය - නන්දා මාලිනී
ගී පද - සුනිල් ආරියරත්න
සංගිතය - එච්.එම්. ජයවර්ධන



හා මල් පිපෙන්නෙ - ක්‍රිස්ටෝපර් පෝල් | Ha mal pipenne - Christopher Paul

හා මල් පිපෙන්නෙ ගඟ ගලන්නෙ හඬ නගා
මැණිකෙ නිසයි ගම දිලෙන්නෙ තවත් හැඩ වෙලා //

ගමේ උපන් සිරියාවිය හැඩකාරිය සුකුමාලිය
ඔබෙ රුව හන්දා
පැල්කවියට ගැමි ගීයට කවුරුත් මන බැන්දා
කණට කරට රන් අබරණ මුතු මාලය පට සේලය
මට නැති හන්දා
මගේ පැලට එළිය දෙන්න ඔබ කැමතිද මන්දා

හා මල් පිපෙන්නෙ ගඟ ගලන්නෙ හඬ නගා
මැණිකෙ නිසයි ගම දිලෙන්නෙ තවත් හැඩ වෙලා //

අහල පහල නිළමෙලාට ටිකිරිලාට ගෙදර අයට
බොරුවක් කියලා
ඔරු පදින්න ගී ගයන්න ඔබ එනවද මැණිකා
උදේ සවස මේ දොළ ළඟ අර වැට ළඟ ගං ඉවුරේ
මම සැඟවී ඉන්නම්
පෝය දාට වන්දනාවෙ නුවර යන්න එන්නම්

හා මල් පිපෙන්නෙ ගඟ ගලන්නෙ හඬ නගා
මැණිකෙ නිසයි ගම දිලෙන්නෙ තවත් හැඩ වෙලා //

ගමේ උපන් සිරියාවිය හැඩකාරිය සුකුමාලිය
ඔබෙ රුව හන්දා
පැල්කවියට ගැමි ගීයට කවුරුත් මන බැන්දා
කණට කරට රන් අබරණ මුතු මාලය පට සේලය
මට නැති හන්දා
මගේ පැලට එළිය දෙන්න ඔබ කැමතිද මන්දා

හා මල් පිපෙන්නෙ ගඟ ගලන්නෙ හඬ නගා
මැණිකෙ නිසයි ගම දිලෙන්නෙ තවත් හැඩ වෙලා //



ගායනය - ක්‍රිස්ටෝපර් පෝල්


කෙහෙරැල් කඩාගෙන - සේනානායක වේරලියද්ද | Keherel kadagena - Senanayaka Weraliyadda


කෙහෙරැල් කඩාගෙන ආදර අරුණැල්ලේ
නාඹර නුරා නුඹ ළඟ ඉඳ දිය නෑවේ
බැල්මෙන් කතාවෙන් කලබලයක් නැත්තේ
කොහොමද ළඳුනි ඔය විධියට හැඩ බැලුවේ //

නිතරම පෙරෙන්නේ සරදම් කවට කතා
සියොළඟ දුවන්නේ පියකරු සුපෙම්වතා
වන වදුලක සැඟවුණ සිව්පාද සතා
සමග ඔබී ඔබෙ කරවට කිඳුරු පබා

කෙහෙරැල් කඩාගෙන ආදර අරුණැල්ලේ...

පුරඟුන් නිදන ඉස්තාලය අතේ අරන්
අරියාදුවට දුන් සිනහව සින්න කරන්
කයිවාරුවට නවගුණ වැල තුරුළු කරන්
කිරිගරුඬෙන් බේසම ළඟ පතුල බලන්

කෙහෙරැල් කඩාගෙන ආදර අරුණැල්ලේ... //


ගායනය - සේනානායක වේරලියද්ද
ගී පද - පද්මකුමාර මෙත්තසේන
සංගීතය - තරුපති මුණසිංහ



පින් මන්ද රංග භූමියේ - සේනානායක වේරලියද්ද | Pin manda ranga bhumiye - Senanayaka weraliyadda


පින් මන්ද රංග භූමියේ
පෙම් බැන්ද සිංහ සීවලී
නුඹ මන්ද ලෙනෙන් පිට වෙලා ගියේ
මං සිංහයාට බයයි නංගියේ
මං සිංහයාට බයයි නංගියේ

වැදි රජ සමගින් අවසැඟ
මනමේ කුමරිට රැවටුණ //
මනමෙ කුමරා මමයි නංගියේ
ධනුදර වුණාට ඉහත සංදියේ
ධනුදර වුණාට ඉහත සංදියේ
මං සිංහයාට බයයි නංගියේ
මං සිංහයාට බයයි නංගියේ

පින් මන්ද රංග භූමියේ...

දුනු කඩු මොටදැයි ප්‍රේමෙට
වෙඬරු සදිසි උණු වෙන සිත් මිස //
තිරය මෑත් කරන වංගියේ
අසිපත ගෙන නුඹ කොහි සැඟවුණිදෝ
අසිපත ගෙන නුඹ කොහි සැඟවුණිදෝ
මං සිංහයාට බයයි නංගියේ
මං සිංහයාට බයයි නංගියේ

පින් මන්ද රංග භූමියේ
පෙම් බැන්ද සිංහ සීවලී
නුඹ මන්ද ලෙනෙන් පිට වෙලා ගියේ
මං සිංහයාට බයයි නංගියේ
මං සිංහයාට බයයි නංගියේ

මං සිංහයාට බයයි නංගියේ ///



ගායනය, සංගීතය - සේනානායක වේරලියද්ද
පද රචනය - වසන්ත දුක්ගන්නාරාල



පෙරදා මහ රෑ - නන්දා මාලිනී | Perada maha re - Nanda Malini


පෙරදා මහ රෑ මා සිහිලැල් උර මඬළේ
මුහුණ හොවා ගෙන ළසොවින් වැළපුන
ඔබේ විඩාපත් නෙතින් ගලා ගිය
කඳුළක කැළලක් ඉතිරි වෙලා //

උරහිස තැවරී වියැළුණු කඳුළෙන්
ඔබගේ සුනරුත් පැතුමක ගිණි ඇත
සදා දැවෙන්නෙමි ඒ ගින්නෙන්

පෙරදා මහ රෑ...

ඔබහට පෙම් කළ යුගය නිමා කර
වෙන් වී යන්නට දවස පැමිණ ඇත
සමාව දෙන් මට සෙනෙහෙ සිතින්

පෙරදා මහ රෑ... //


ගායනය - නන්දා මාලිනී
ගී පද - මහාචාර්ය සුනිල් ආරියරත්න
සංගීතය - ස්ටැන්ලි පීරිස්



Related Posts Plugin for WordPress, Blogger...